ലൌ ആൻഡ് ലിപ്സ് (ഫോർ ലവേഴ്സ് ഓൺലി)

ലൌ ആൻഡ് ലിപ്സ് (ഫോർ ലവേഴ്സ് ഓൺലി)

അടുക്കുമ്പോഴേക്കും അകലുകയും, അകലുന്തോറും അടുക്കുകയും ചെയ്യുന്ന ആവേശഭരിതമായ , മാസ്മരികമായ , ദിവ്യമായ അനുഭവമാണ് പ്രണയം. മറിച്ച് ആരും പറയുകില്ലായിരിക്കാം.

                 കാത്തിരുപ്പും, പരിഭവങ്ങളും കിന്നാരവും ഒക്കെ പ്രണയത്തിന്റെ വിവിധ ഭാവങ്ങളും ഭാവനകളുമാണ്. ഇണങ്ങിയും പിണങ്ങിയും പ്രണയം ജീവിതത്തിൽ ഉണ്ടാകുന്നു. ചിലർക്ക് പ്രണയത്തിലൂടെ മാത്രമേ ജീവിക്കുവാനാകൂ എന്നതിൽ തെല്ലും ആശ്ചര്യം തോനുന്നില്ല.

                      എന്നാൽ മനസ്സിൽ തോന്നുന്നത് പൂണ്ണമായും തുറന്നറിയിക്കുവാൻ പ്രണിതാക്കാൾക്ക് കഴിയുന്നില്ല. പറയുമ്പോൾ വാക്കുകൾകൊണ്ട് പ്രണയത്തിന്റെ സൌന്ദര്യം നഷ്ടപ്പെടുന്നതായി അഭിപ്രായമുണ്ട്. അത്രമേൽ ഉണ്ടായിരുന്ന ഇഷ്ടങ്ങൾ വാക്കുകളുടെ ഉപചാരങ്ങളിൽ വന്നുചെന്ന് അവസാനിക്കുന്നു. പറയാ‍തെ അറിയുന്ന പ്രണയമാണ് അവരേ സംബന്ധിച്ച് പ്രണയത്തിന് ആധാരം

          പ്രണയത്തിനു പറയുവാനുള്ളതെല്ലാം കാത്തുനിന്ന് അറിയുവാൻ തിടുക്കം പ്രകടമാകുന്ന പ്രണയത്തിന് സ്വീകാര്യമല്ല. ഈ സുദിനത്തിൽ എന്റെ മനസ്സിലെ ഒരു ചിന്ത പ്രണയത്തെക്കുറിച്ച് സങ്കൽ‌പ്പിക്കുന്നവർക്കായി പങ്കുവയ്ക്കുന്നു.

          വാക്ക്, കാഴ്ച്ച; ഇവയിൽ ഏതിനാണ് പ്രണയത്തെ സാഫല്ല്യത്തിന്റെ നിറവിലേക്ക് പകർത്തുവാൻ സഹായിക്കുക. ആയതിനാൽ അധരങ്ങളും പ്രണയവും തമ്മിലുള്ള അഭേദ്യമായ ബന്ധത്തെക്കുറിച്ച് എന്റെ വിചാരങ്ങൾ നിങ്ങളിലേക്ക് ഇങ്ങനെ വന്നെത്തുന്നു.

       ഒരുപക്ഷേ പ്രണയം നാം ഏറ്റവും അനുഭവിച്ചരിയുന്നത് അത് പറയുമ്പോൾ മാത്രമായിരിക്കാം. ആ നിമിഷങ്ങൾ ഓർമ്മകളിൽ നിർവൃതിയുടെ സ്ഫുലിംഗങ്ങൾ ഉണ്ടാക്കിയേക്കാം.

                        എന്നാൽ കാഴ്ച്ച പ്രണയത്തെ വ്യത്യസ്തമായ ഒരു ത്രിമാന തലത്തിലേക്ക് കൊണ്ടുചെന്നെത്തിക്കും എന്നത് വാസ്തവമാണ് .ഒന്ന് ഒരു അനുഭവവും മറ്റൊന്ന് ലഹരിയും ആകുന്നത് ആകർഷണീ‍യമായ പ്രണയ സൌന്ദര്യമാണ്.

                                               വെള്ളിത്തിരയിലെ പ്രണയ സങ്കൽ‌പ്പങ്ങൾക്കും, നോവലുകളിലെ നായികാ- നായക ഭാവങ്ങൾക്കും, കവിതയിലെ സൌകുമാര്യകതയുമെല്ലാം ദ്യോതിപ്പിക്കുന്നത് ചുംബനത്താൽ മൂടിയ പ്രണയമാണ്. 

                   ചുംബനം മഴയായും, പൂക്കളായും, സുഗന്ധമുള്ള ഓർമ്മകളായും അഭ്രപാളികളികളിൽ മിന്നിത്തെളിയുന്നു. ഇതെല്ലാം പ്രണയത്തിന്റെ ഭാവപ്പകർച്ചകൾ മാത്രമാ‍ണ്.

                                             എന്നാൽ കണ്ണുകൾക്ക് പരസ്പരം കഥകൾ പറയുവാൻ ആകുന്നത്രയും വാക്കുകൾ കൊണ്ട് ആകുമോ?.സ്നേഹാർദ്രമായ വാക്കുകൾ ഇല്ലെങ്കിൽ പ്രണയത്തിനെ ഭാവി എന്താകും?.

                       കാഴ്ച്ച എന്ന അസാർവ്വത്രികമായ പ്രതിഭാസം , അതായിരിക്കാം അഭൌമമായ പ്രണയത്തിലേക്കായി വിഭാവനം ചെയ്യപ്പെട്ടിട്ടുള്ളത്. വാക്കുകൾ തീരെ ഇല്ലാതെ പ്രണയം അനുഭവിക്കുന്നവർ ഏറെയും ഇതിനെ അനുഭാവത്തോടെ കാണുമായിരിക്കും

    ദർശനമായിരിക്കാം ഒരുപക്ഷേ യഥാർത്ഥ പ്രണയത്തെ മോഹങ്ങളുടെ ക്യാൻവാസിലേക്ക് നിറച്ചാർത്ത് കൊണ്ട് തെല്ലും ആത്മാവ് ചോർന്നുപോകാതെ പകർത്തുവാൻ സഹായിക്കുന്നത്. 

                                            യുവാക്കൾക്ക് സമാഗമങ്ങൾ തന്നെ യാണ് പ്രണയത്തിന്റെ മൂർത്തീഭാവമാകുന്നത്. പക്ഷേ എവിടേയും എഴുതാതെ പോകുന്ന പ്രണയിക്കുന്നവർക്ക് മാത്രമായി അറിയുവാനാകുന്ന പ്രണയത്തിന്റെ ഊഷ്മളമായ പൊരുൾ എന്ത്?

                                              നിന്നേപ്പുണരുവാൻ നീട്ടിയ കൈകളിൽ എന്നെല്ലാം ഓർത്ത്പോകുമ്പോൾ എതമാത്രം എത്രമാത്രം കോരിത്തരിപ്പിന്റെ ഭാവനകളാണ് കവികൾ സമ്മാനിച്ചിട്ടുള്ളത്. അതിലും എത്രയോ വലിയ ഭാവനകളിലൂടെയാണ് നാം ഓരോരുത്തരുടേയും പ്രണയം കടന്നുപോകുന്നത്.

 പ്രണയ മഹാകാവ്യങ്ങൾ രചിച്ചിട്ടുള്ളവർ യഥാർത്ഥത്തിൽ പ്രണയനിമഗ്നരായിരുന്നോ എന്ന് ശങ്കിക്കുന്നു. ഒരിക്കലും കണ്ടുമുട്ടാതെ, ഒരുവാക്കു മിണ്ടാതെ പ്രണയത്തിന്റെ വസന്തത്തിലൂടെ കടന്നുപോകുന്നവർ എത്രമാത്രം.

                               മൌനമായ പ്രണയം വാചാലമായും, പൂക്കൾ വിരാജിക്കുന്ന സരോവരമായും.. തുമ്പികളും, പ്രാവുകളും ,അരയന്നവുമായൊക്കെ പ്രണയിക്കുന്നവർ മാത്രം അറിയുന്നു.

                    എന്തായാലും പ്രണയവും അധരങ്ങളും തമ്മിൽ വേർപിരിയുവാനാകാത്ത ഏതോ ബന്ധമുണ്ട്. അതുതന്നെയാണ് പ്രണയത്തിനെ ആത്മാവായി കരുതേണ്ടത്. മധുരമായ വാക്കുകളിലൂടെ മധുരതരമായ പ്രണയാനുരാഗത്തിന്റെ മൃദുസ്പർശങ്ങൾ…….

      ഈ സുദിനത്തിൽ നല്ല വാക്കിലും, നല്ല കാഴ്ച്ചയിലും നമകൾ നിറഞ്ഞ പ്രണയം പിറക്കട്ടെ. സർഗ്ഗാത്മകമായി അവയെ ആത്മസമർപ്പണത്താൽ ഏവരും ഉണർത്തട്ടെ . ഹൃദയപൂർവ്വം സ്നേഹിക്കുന്ന ഏവർക്കും എന്റെ വാലന്റൈൻസ് ദിനത്തിന്റെ ആശംസാ പുഷ്പ്പങ്ങൾ………….

………വിജൂവികർത്താ…………………